UNESCO halqara teşkilâtı ilhaq etilgen Qırımda monitoring missiyasını yerleştirilmek ve medeniyet abideleriniñ qorçalanması oğrunda küreşmek içün imkân açmaq qararına keldi. Bunı aprel 11-de tış işleri naziri Pavlo Klimkin Twitterde bildirdi.
«UNESCOnıñ İcra şurası Qırımğa dair muim bir qarar aldı. Asılında bu, monitoring missiyasını yerleştirilmek ve Qırımda tasil almaq aqları, ilimler, medeniyet abideleri ve şu cümleden Han sarayınıñ muafaza etilmesi oğrunda küreşmek içün imkândır. İşğalci ukümetke Ukrainanıñ variyetini çaypamağa ve mahv etmege bermeyik!», – yazdı o.
Ukraina Medeniyet nazirligi, Rusiyeniñ ilhaq etilgen Qırım territoriyasında yapqan areketleri yarımadanıñ topraqlarındaki Ukrainanıñ medeniy mirasına zarar ketire, dep iddia ete. Bu areketler, Ukrainanıñ «Medeniy mirasnıñ muafaza etilmesi» qanunını ve, ondan ğayrı, UNOSCOnıñ 1972 senesi Konventsiyasını bozalar.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
