Almaniya kantsleri Angela Merkel Almaniya, Ukraina ve Frenkistan reberleri mayıs ayında Almaniyanıñ Aachen şeerinde, işğal etilgen ukrain Donbassındaki vaziyetnitertipke ketirüv boyunca muzakerelerniñ «Norman formatı»nda, onıñ dördünci iştirakçisi dep esaplanğan Rusiye prezidenti Vladimir Putinsiz körüşmege mumkün olacağı aqqındaki haberni tasdıqladı.
Bunen beraber Azatlıq Radiosı haber etkenine köre, Berlin şeerinde Ukraina prezidenti Petro Poroşenkonen beraber keçken matbuat konferentsiyasında Merkel, bu vaziyette «Norman formatı»nda yapılacaq körüşüv Vladimir Putin olmadan keçmek mumkün olacağını qayd etken edi.
Ukraina eyyeti terkibinde Almaniyada bulunğan Ukraina tış işleri naziri Pavlo Klimkin, özüniñ almaniyalı zenaatdaşı Heiko Maasnen körüşken soñ Twitterde: Kiçkene bir muvafaqiyet ışığı körsek bile «Norman formatında» nazirler olaraq (yaqın zamanda) toplanırmız», dep yaza.
Rusiye tış işleri nazirligi yaqın künlerde «Norman formatında» iç bir seviyede er angi bir körüşüv planlaştırılmağanı aqqında haber ete.
Aprelniñ 2-nde Rusiyeniñ «Kommersant» neşiri, prezident memuriyeti ve Ukraina TİNne yaqın «Kyivdeki malümat saibi menbalar» alğan malümatına bazanaraq, «Norman formatına» kirgen üç devlet reberi Aachende körüşebilecegi aqqında haber etkenin edi. Mayıs ayında şu şeerde Ulu Karl adına halqara mükâfatınıñ ananeviy taqdim merasimi ötkerilecek. Mükâfat Frenkistan prezidenti Emmanuel Macronğa taqdim etilecek.
Dört devletniñ tış işleri nazirleriniñ iştirakinen «Norman formatında» yapılacaq körüşüv, ilk-evelâ fevral ayında Munichte ötkerilecek telükesizlik konferentsiyasında keçirilecek olsa da, bazı iştirakçilerniñ planları deñişkeni sebebinden bozulğan edi.
