Kreml nezareti altındaki Bağçasaray mahkemesinde politsya hadimini aqaretlegeninde qabaatlanğan Şevket Razzaqovnıñ işi boyunca mahkeme taqiqat bitti. Anda şaatlar politsiya hadimi aqaretlenmegenini tasdıqladılar. Bu aqta Qırım.Aqiqatqa adliyeci Mammet Mambetov haber etti.
«İmayeci Razzaqovnıñ ahlâqiy davranışı boyunca hulâsa çıqarğan mütehassısnı sorğulamağa rica etti. Bunen beraber imayeci, Razzaqov tükürgeninden ğayrı, politsiya hadimini sözlernen aqaretlegenini iddia etken mütehassısnıñ mahkemege çağırılıp, sorğulanmağa rica etti. Cinaiy iş materiallarında, bu mütehassıs video çekilüvlerindeki dudaq areketlerinden oquğanını köstergen iddialarından ğayrı, Razzaqov politsiya hadimini aqaretlegenine dair iç bir delil yoq. İş obyektiv şekilde baqılğanında Razzaqov aqaretleycek bir areket yapqanını ne biri, ne de digeri yüz faiz tasdıqlap olamay», – dep ikâye ete adliyeci.
Mambetov ayrıca, kelecek oturışuvda munaqaşalar yapılcağını qayd etti.
2017 senesi aprelniñ 13-nde rusiyeli küç idaresiniñ hadimleri Bağçasaray sakini qırımtatar faali Seydamet Mustafayevniñ evini tintken edi. Politsiya areketlerini taqip etmek içün qırımtatar faalleri, su cümleden Razzaqov toplanğan ediler. Politysiya hadimleri ve OMON toplanğan şahıslarnı quvıp, küç qullanğandı. Neticede yedi kişi tutlıp alınğan edi, Razzaqov ise politsiya hadimine «tükürerek aqaretlengeninde» qabaatlanğan edi.
Qırım ilhaqından soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqası olğanında şeklengen musulmanlarnıñ evlerinde sıq-sıq tintüvler keçirilmege başladı.
