Ukraina millet vekilleri Rusiye tarafından ilhaq etilgen Qırımda mahküm etilgen ukrain faili Vladimir Baluhqa muracaat azırlap, açlıq tutmaqtan vazgeçmege rica etkenler. Bunı köstergen vesiqa Ukraina Yuqarı Radasınıñ saytında aprelniñ 10-nda derc etilgen.
Muracaatta «sağlıqnıñ pek tez fenalaşqanı ve ayatnı coymaq telükesi sebebinden» açlıqnı toqtatmaq ricası mevcut.
Deputatlar Vladimir Baluhqa ve onıñ küreşine nisbeten «sıñırsız sayğı» iss etkenlerini ve o «bütün memleket içün nümine olğanını» bildirdiler.
«Ukrainağa sağ qaramanlar lâzim. Siziñ sağlığıñız ve ayatıñız Ukrainanıñ ğalebesinde eñ güzel qısım olacaqtır», – dep aytıla muracaatta.
Baluh, mart 19-da ilân etken muddetsiz açlıqnı tutmağa devam ete.
Mart 14-te Kremlniñ kontroli altında olğan Qırım Yuqarı mahkemesi ukrain faaliyetçisi Volodımır Baluhqa dair qararnı deñiştirdi. Akem qabaatlavdan arbiy yedeklerniñ satın alınması aqqında maddeni alıp taşladı. Faaliyetçige qarşı koloniya-qasabada 3 yıl ve 5 ay muddetine azatlıqtan marum etüv ve, ondan ğayrı, 10 biñ ruble (qararnen 4,6 biñ hrn.) miqdarında cöreme şeklinde uküm çıqarılğan edi.
Mart 28-de Ukraina Tış işleri nazirligi Baluhnıñ deral azat etilmesini talap etti. Ukraina ombudsmeni Lüdmila Denisova, açlıq tutqan faaliyetçige ekimlerni yibermek ricasınen Rusiyedeki zenaatdaşına muracaat etti.
Rusiye FSBsi Volodımır Baluhnı 2016 senesi dekabr 8-de yaqaladı. FSB hadimleri Volodımır Baluh yaşağan evniñ tavanında 90 patron ile bir qaç trotil şaşkasını taptılar, dep iddia ete ediler.
Baluhnıñ qorçalavı ve aq-uquq qorçalayıcıları, o, Ukraina vatanperveri olğanı içün – eviniñ azbarında Ukraina bayrağı olğanı içün repressiyalar qurbanı olğanını iddia eteler.
