Qurman rayonında 2017 senesi oktâbr ayında bir kişilik piketke çıqqan qırımtatar faalleri Ayder İbragimov ve Reşat Emiruseinovnıñ cöremeleri tölendi.
Martnıñ 29-nda «Qırım birdemligi» cemaat birleşmesi haber etkenine köre,bir kün evel tölengen 10 biñ rublelik cöremeler (4550 grivna civarıbda – QA), «Qırım marafonı» çerçivesinde toplanğan on rublelik maden paranen tölengen.
«Qırım birdemligi» «pervasız olmağanlar birdemlik» köstergeni içün minnetdarlıq bildirip, qırımtatar faalleriniñ cöremelerini tölemek içün paralarnı «qırımtatarlarından ğayrı, rusiyeliler ve ukrainler de toplağanını» qayd etti.
2017 senesi oktâbrniñ 14-nde yarımadada telükesizlik hadimleriniñ qırımtatarlar, musulmanlarğa qarşı repressiyalarına narazılıq köstermek maqsadınen bir sıra bir kişilik piketler yapıldı. Piket iştirakçilerine qarşı, tayin etilgen piket ötkerüv tertibini bozğanları içün (Rusiyeniñ Memuriy tertip bozuv aqqında kodeksi, 20.2 maddesi, 5-nci qısım) memuriy protokollar tizildi.
2017 senesi iyül ayında «Qırım birdemligi» birleşmesi, Qırımda siyasiy mabüsler ve cemiyet faaliyetçilerine qol tutmaq maqsadınen «Qırım marafonı» çerçivesinde para toplanıp başlağanını ilân etken edi. Tedbir teşkilâtçılarınıñ niyetine köre, «pervasız olmağanlarnıñ birdemligi»ni köstermek içün paranı 10 Rusiye rublesi (qararnen 4 hrivna – QA) qıymetinde maden aqçalar ile toplaylar.
Qırım ilhaqından soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
