Martnıñ 28-nde Moskva şeer mahkemesi Tverskoy rayon mahkemesiniñ qırımtatar Milliy Meclisi reisiniñ muavinleri Ahtem Çiygoz ve İlmi Umerovnıñ, Rusiye prezidenti memuriyetine bergen hususiy şikâyetlerini qabul etmege red etkeninen alâqalı şikâyetini deñiştirmey qaldırdı. Bu aqta martnıñ 29-nda Qırım.Aqiqatqa rusiyeli adliyeci Nikolay Polozov ikâye etip berdi.
«Tünevin (martnıñ 28-nde – QA) kerçekten de mahkeme oturışuvı ötkerildi, ancaq qısqartılğan, kimse çağırılmağan alda keçti. Olar Ahtem Çiygoz ve İlmi Umerovnıñ Rusiye prezidenti memuriyetine bergen hususiy şikâyetlerini qabul etmege red etkeninen alâqalı şikâyetlerinen deñişmeden qalacağına dair qarar qabul ettiler», – dedi Polozov.
Onıñ sözlerine köre, bu qarar qanunsız sayıla.
«Men bellesem, bu tam manada bir uquqiy saçmalıq. Tverskoy rayon mahkemesiniñ mahkemecisi öz qararında, prezident emri altında olğanlar mahkeme taqibine qarşı immunitetke saip olğanlarına işaret etmekte. Böyleliknen Rusiye Anayasasınıñ 24-nci maddesi bolğan sayıla. Muayyen şahıslarnıñ uquq ve serbestliklerinen alâqalı olğan devlet aktları, tanışmaq üzre berilmek kerek.Bu vaziyette Rusiye prrezidenti memuriyeti tolusınen imaye etilmekte. Bu ise, rusiyeli mahkemecilernin bütünley akimiyetke bağlı areket etkenini köstere», – dey adliyeci.
Polozov artıq, Moskva mahkemesiniñ qararı «İnsan aqları Avropa mahkemesine şikâyet etilecek» dep ayttı.
Daa evel Polozov Moskvanıñ Tverskoy rayon mahkemesiniñ qırımtatar Milliy Meclisi reisiniñ muavinleri Ahtem Çiygoz ve İlmi Umerovnıñ bergen hususiy şikâyetlerini qabul etmege red etkenine dair şikâyetini bergen edi. Söz hususan, Çiygoz ve Umerovnıñ Rusiye prezidenti memuriyetine, olarnıñ af etilüvinen bağlı malümat berilmesine dair hususiy şikâyetlerini qabul etilmemesinen alâqalı edi.
Yanvarniñ 26-nda Moskvanıñ Tverskoy rayon mahkemesi şikâyetni red etken edi.
Kreml nezaretindeki Qırım Yuqarı mahkemesi qırımtatar halqınıñ liderlerinden biri olğan Ahtem Çiygoznı 8 yıllık koloniya cezasına mahküm etken edi. O, 2015 senesi yanvar ayında 2014 senesi fevralniñ 26-nda Qırım Yuqaru Şurası binasınıñ ögünde Ukrainanıñ topraq bütünligine bağışlanğan mitingde iştirak etkeni içün tutulıp alınğan edi. Qırımnıñ rusiyeli akimiyeti Çiygoznı kutleviy nizamsızlıqlar teşkil etmekte qabaatlay.
Daa soñra Qırımnıñ rusiyeli mahkemesi Umerovnı eki yıllıq yaşav tarzı koloniyada qalmasına üküm ete. Umerov kutleviy surette separatizmge çağırmaqta qabaatlanğan edi.
Rusiye akimiyeti oktâbrniñ 25-nde Qırımda mahküm etilgen Qırımtatar Milliy Meclisi reisiniñ muavinleri Ahtem Çiygoz ve İlmi Umerovnı azat etip, Türkiyege teslim etti. Daa soñra Umerov ve Çiygoz Kyivge keldiler.
