Moskva şeer mahkemesi Moskvanıñ Tverskoy rayon mahkemesiniñ qırımtatar Milliy Meclisi reisiniñ muavinleri Ahtem Çiygoz ve İlmi Umerovnıñ Rusiye prezidenti memuriyetine bergen hususiy şikâyetlerini qabul etmege red etkeninen alâqalı şikâyetini baqıp çıqmağa qarar berdi.
Bu aqta martnıñ 28-nde rusiyeli adliyeci Nikolay Polozov özüniñ Facebookında haber etmekte.
Onıñ sözlerine köre, mahkeme şikâyetlerni «qısqartılğan (yazılı) şekilde» bağmağa qarar bergen.
«Yani taraflarnıñ mahkeme oturışuvında şahsen iştirak etmeden, protokolsız ve audioqayd yapmadan – perde artında keçirmek istey. Mahkeme qabul etken qarar aqqında Moskva şeer mahkemesinden haber almağa teklif etile. Mahkeme qararını ise, hususan birinci basamaq mahkemesinden, o anda yollanğan soñ almaq mumkün olacaq», – dep ayttı Polozov.
Adliyeci, Ahtem Çiygoz ve İlmi Umerovnıñ şikâyetleriniñ baqılğanınen alâqalı neticeler martnıñ 28-nde derc etilmek kerek olğanını qayd etti.
Daa evel Polozov Moskvanıñ Tverskoy rayon mahkemesiniñ qırımtatar Milliy Meclisi reisiniñ muavinleri Ahtem Çiygoz ve İlmi Umerovnıñ bergen hususiy şikâyetlerini qabul etmege red etkenine dair şikâyetini bergen edi.Söz hususan, Çiygoz ve Umerovnıñ Rusiye prezidenti memuriyetine, olarnıñ af etilüvinen bağlı malümat berilmesine dair hususiy şikâyetlerini qabul etilmemesinen alâqalı edi.
Yanvarniñ 26-nda Moskvanıñ Tverskoy rayon mahkemesi şikâyetni red etken edi.
Kreml nezaretindeki Qırım Yuqarı mahkemesi qırımtatar halqınıñ liderlerinden biri olğan Ahtem Çiygoznı 8 yıllık koloniya cezasına mahküm etken edi. O, 2015 senesi yanvar ayında 2014 senesi fevralniñ 26-nda Qırım Yuqaru Şurası binasınıñ ögünde Ukrainanıñ topraq bütünligine bağışlanğan mitingde iştirak etkeni içün tutulıp alınğan edi. Qırımnıñ rusiyeli akimiyeti Çiygoznı kutleviy nizamsızlıqlar teşkil etmekte qabaatlay.
Daa soñra Qırımnıñ rusiyeli mahkemesi Umerovnı eki yıllıq yaşav tarzı koloniyada qalmasına üküm ete. Umerov kutleviy surette separatizmge çağırmaqta qabaatlanğan edi.
Rusiye akimiyeti oktâbrniñ 25-nde Qırımda mahküm etilgen Qırımtatar Milliy Meclisi reisiniñ muavinleri Ahtem Çiygoz ve İlmi Umerovnı azat etip, Türkiyege teslim etti. Daa soñra Umerov ve Çiygoz Kyivge keldiler.
