Eger halqara cemaatçılıq Rusiye Qırımnı ilhaq etkenini qabul etse, Moskva halqara uquqnı bozmağa devam eter, dep haber ete Poloniya TİNniñ matbuat hızmeti, Poloniya tış işleri naziriniñ muavini Bartosz Cichockiniñ sözlerine esaslanıp.
«Rusiye Qırımdan keter. Bu zaman meselesidir. Ancaq, eger bizler Rusiye yarımadanı işğal etkenini qabul etsek, Rusiye başqa devletlerde de halqara uquqnı bozmağa devam eter», – denilmekte beyanatta.
Nazir muavini, Qırım meselesine «köz yumma siyaseti» Avropa birligine qarşı havfsızlıq telükesini arttıracağını da qayd etti.
ABniñ tış işleri ve havfsızlıq siyaseti boyunca yüksek temsilcisi Federika Mogerini martnıñ 19-nda Ukrainanı ziyaret etken vaqtında, Avropa Birliginiñ Ukraina içün tolu siyasiy ve maliyeviy yardımını em de Qırımnıñ qanunsız işğalini tanımama meselesinde qatiy noqta-i nazarını tasdıqlağanını haber etken edi.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
