İlhaq etilgen Qırımnıñ informatsion aleminde qullanılğan duşmanlıq tili ukrainler, qırımtatarlar, qırımtatar Milliy Meclisiniñ tarafdarları, Avromaydan faalleri, musulman ve muacirlerge qarşı qullanılmaqta.
Bunen bağlı malümat «Qırımnıñ informatsion alemindeki duşmanlıq tili» adlı maruzada mevcut. O martnıñ 28-nde Kyivde taqdim etildi.
Tedqiqatçınıñ malümatına köre, qadınlar, LGBT-cemiyetiniñ vekilleri, jurnalistler, çeşit diniy konfessiyalarnıñ vekilleri de ayrıca nefret obyektlerine aylânğan.
Tedqiq etilgen kontentte nefret doğurğan 718 dane misal qayd etilgen. Olardan qanunsız nutuq misalleriniñ ekseriyeti (479) Rusiye telekanallarınıñ yañılıqlarında rastkelgen. Qırım KHV saytlarında monitoring devamında 168 misal tapılğan, Kreml nezareti altındaki saytlarda ise – 71 dane.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
