Amerika Birleşken Devletleri ögümizdeki bazarertesi künü, sabıq rusiyeli casus Sergey Skripalniñ zeirlenüvine Büyük Britaniyanen birdemlik köstermek içün, bir qaç rusiyeli diplomatnı sürgün etebile.
Martnıñ 24-nde öz menbalarına tayanğan Bloomberg informatsion agentligi haber etkenine köre, Donald Trump öz mesleatçılarınen diplomatlarnıñ sürgün etilmek kerek olğanınen bağlı teklifinen razı oldı.
Haberge binaen, Skripal işi boyunca Washington munasebetini bildirgen çareler olaraq Donald Trump ABDniñ Rusiyedeki elçisi Jon Huntsman, maliye, ticaret, adalet ve mudafaa nazirleri em de mahsus hizmetlerniñ vekillerinen yapılğan körüşüvinde muzakere etken.
Barak Obama prezidentlik yapqan devirde 2016 senesi dekabr ayında ABD artıq bir sıra rusiyeli diplomatnı sürgün etken edi. O zamandaki beñzer adım rusiyeli hakerlerniñ ABD prezident saylâvlarına qarışqanı sebebinden yapılğan edi.
Bir qaç aydan soñ Moskva, ABDniñ Rusiyede çalışqan diplomatik missiyasınıñ sayısı bayağı eksiltmesini talap etken edi.
