Ukrainanıñ vaqtınca işğal etilgen topraqlar nazirligi ilhaq etilgen Qırımda qırımtatar faali Nariman Memedeminovnıñ tevqifi qanunsız ve aqsız olğanını ayta. Bu aqta martnıñ 23-nde nazirlikniñ Facebook saifesinde haber etilmekte.
«Qırımtatar halqınıñ temsilcisi - Ukraina vatandaşına qarşı nevbetteki qanunsız bir areket. Bu – Rusiyeniñ telükesizlik küçleri tarafından yarımadanıñ ilhaqınen razı olmağan ve işğal şaraitlerinde bile öz aq-uquqlarını imaye etmege ıntılğan Qırım sakinlerini qorquzmaq maqsadınen teşkil etilmekte», – denilmekte haberde.
Nazirlik iddia etkenine köre, Ukraina ükümeti işğal altında qalğan Ukraina vatandaşlarına qol tutmaq maqsadınen, elinden kelgen er şeyniyapmağa tırışa.
«Biz halqara cemaatçılıqnıñ diqqatini Qırımda insan aqları bozıluvını közetecek mustaqil uquqimaye teşkilâtlarınıñ vekilleri bulunmaq kerek olğanıve Rusiye ükümeti tarafından Ukraina vatandaşlarınıñ taqip etüvni toqtatmaq içün tazyıq yapılmaq kerek olğanına çekemiz», – denilmekte nazirlikniñ haberinde.
Martnıñ 23-nde Kreml nezareti altındaki Aqmescit Kiev rayon mahkemesinde qırımtatar faali Nariman Memedeminovnı mayısnıñ 16-na qadar tevqif etti.
Bir kün evel rusiyeli küç idaresinin hadimleri ve uquqqoruyıcılar Nariman Memedeminovnıñ evinde tintüv yapqan ediler. Tintüvden soñ onı Aqmescit FSB idaresine sorğulamaq içün alıp keteler.
Teşkilât 2016 senesi fevralnn 11-nde Memedeminovnıñ evinde artıq tintüv yapılğan edi ve 2017 senesi iyülniñ 13-nde Bağçasaray rayon mahkemesi Memedeminovke qarşı memuriy iş açıp, 2017 senesi aprelniñ 13-nde Seydamet Mustafayevniñ evinde tüntüv yapılğan maalde, onıñ evi ögünde sanki dersiñ, qanunsız miting keçirdi dep qabaatlan edi. Tintüv maalinde semetdeşine qol tutmaq maqsadınen pek çoq qırımtatar kelgeninde, olarnıñ arasında Nariman da Memedeminov da bar edi.
Qırım ilhaqından soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
