İlhaq etilgen Qırımda prezident saylâvları keçirgeni içün Rusiyege qarşı sanktsiyalar quvendirilmesi mumkün dep saya Frenkistan tış işleri naziri Jean-Yves Le Drian.
«İnterfaks-Ukraina» haber etkenine köre, Le Drianğa Qırımda prezident saylâvları keçirgeni içün Rusiyege qarşı sanktsiyalar quvendirilüvi ihtimalinen bağlı sual berilgen.
«Frenkistan adından - sanktsiyalarnı devam ettirüv ve quvetlendirüv, belli olğanı kibi altı ay evelsi uzatılğan belli bir saanen bağlı sanktsiyalar, ayrıca er zaman uzatılabilecek şahslarğa qarşı kirsetilgen sanktsiuyaşlar ğayesi», – dep bildire informagentlik Le Driannıñ Ukraina TİN yolbaşçısı Pavlo Klimkinnen keçirgen matbuat konferentsiyasında aytqan sözlerini.
O, ayrıca, soñki parlment saylâvlarında saylânğan Rusiye Devlet Dumasınıñ bir sıra deputatları, sanktsiyalar cedveline kirsetilgeni aqqında hatırlattı.
Nazir yarımadada insan aqları ve onıñ arbiyleştirilüvinden raaatsız olğanını bildirdi.
Martnıñ 18-nde Rusiyede ve ilhaq etilgen Qırımda prezident saylâvları ötkerildi. Resmiy Kyiv ve bir sıra halqara teşkilâtlarnen beraber dünyanıñ bir çoq devleti yarımadada keçken saylâvlarnı tanımay.
Fevralniñ 16-nda Ukraina prezidenti Petro Poroşenko dünya cemaatçılığını ilhaq etilgen Qırımda Rusiye prezidentiniñ kelecekteki saylavlarınıñ neticelerini tanımamağa çağırğan edi.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
