Uquqimayeci, jurnalist ve blogerler martnıñ 22-nde rusiyeli küç idaresiniñ hadimleri tutıp alğan cemaat jurnalisti, qırımtatar faali Nariman Memedeminovnıñ tez vaqıtta azat etilmesini talap eteler.
İnsan aqları malümat Merkezi haber etkenine binaen, uquqimayeci teşkilâtlar ve qırımtatar faalleri «tez vaqıtta cemaat jurnalisti, faal, «Qırım birdemligi» teşkilâtınıñ temsilcisi Narimam Memedeminovnıñ taqip etmekni toqtatıp, azat etimesi ve ayrıca, onıñ qanunsız tutulıvunı taqiq etmege talap eteler».
Açıq talapqa artıq insan aqları media teşebbüsi, KrımSOS teşkilâtları, advokat Nikolay Polozov, belli jurnalist ve qırımtatar falleri qoşuldı.
Polozov öz Facebook saifesinde qayd etkenine köre, Memedeminov tutulıp alınğab soñ, Rusiye ve ilhaq etilgen Qırımdaki siaysiy mabüslar sayısı 65-ke yetken.
Martnıñ 23-nde Kreml nezareti altındaki Aqmescit Kiev rayon mahkemesinde qırımtatar faali Nariman Memedeminovke sıñırlav tedbiri tayin etilmesi boyunca mahkeme oturışuvı başlandı.
Bir kün evel rusiyeli küç idaresinin hadimleri ve uquqqoruyıcılar Nariman Memedeminovnıñ evinde tintüv yapqan ediler. Tintüvden soñ onı Aqmescit FSB idaresine sorğulamaq içün alıp ketken ediler.
Teşkilât 2016 senesi fevralnn 11-nde Memedeminovnıñ evinde artıq tintüv yapılğan edi ve 2017 senesi iyülniñ 13-nde Bağçasaray rayon mahkemesi Memedeminovke qarşı memuriy iş açıp, 2017 senesi aprelniñ 13-nde Seydamet Mustafayevniñ evinde tüntüv yapılğan maalde, onıñ evi ögünde sanki dersiñ, qanunsız miting keçirdi dep qabaatlan edi. Tintüv maalinde semetdeşine qol tutmaq maqsadınen pek çoq qırımtatar kelgeninde, olarnıñ arasında Nariman da Memedeminov da bar edi.
Qırım ilhaqından soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
