Qırım memuriy sıñırı yanında reydlernen naqliyeciler teşkerile. Bu aqta martnıñ 22-nde Qırım.Aqiqatqa Ukrtranstelikesizlikniñ Qara deñiz regionlarara idaresiniñ başlığı İgor Pastuh ikâye etip berdi.
Onıñ sözlerine köre, reyd esnasında qaydelerni bozğanlar yani kerek vesiqasız çalışqan naqliyeciler tesbit etilgen.
«Teşkeriv neticesinde keçken afta 8 dane protokol tizilgen edi. Bu afta 164-nci maddege binaen 6 dane, 48-nci ve 1-nci maddelerge köre -39 dane protokol tizildi. Protokollar mahkemege yollanıldı», – dep qayd etti Pastuh.
Ukrtranstelikesizlik temsilcisi teşkerüvler devam ettirilecegine işandırdı.
Temsilcilik, naqliye hızmeti bozuluvı içün 17 ile 34 biñ grivna cöreme tölengenini ve bozuluv bir yıl devamında tekrar qaytarılğanı tesbit etilgen taqdirde – 34 biñ grivnadan başlap, naqliye vastası tutulıp alınacağına qadar barğanı aqqında hatırlattı. Bu arada müddetsiz litsenziya fiyatı 1400 grivnağa tutmaqtadır.
Qırım Rusiye tarafından ilhaq etilgen soñ, 2014 senesi Ukrainanıñ qıta qısmınen yarımada arasında memuriy, amma aslında kerçek bir «sıñır» peyda oldı. Memuriy sıñırda «Kalançak», «Çaplınka» ve «Çonğar» olaraq üç kiriş-çıqış noqtası çalışıp başladı.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
