Rusiye prezidentiniñ matbuat kâtibi Dmitriy Peskov haber etkenine köre, Vladimir Putin öz memuriyetine, saylâvlarda onıñ raqibi olğan Kseniya Sobçak amnistiya ya da af etilmesi ricasınen taqdim etken siyasiy mabüsler cedveliniñ «işlenmesi» boyunca buyruq bergen.
«Kerçekten de, Sobçak prezidentke böyle bir cedvel bergen edi. Prezident onı qabul etip, öz memuriyetine onıñ işlenmesini avale etti. Şimdilik ondan ğayrı aytacaq bir şeyim yoq», – dep bildre TASS Peskovnıñ sözlerini.
Martnıñ 19-nda Kseniya Sobçak Vladimir Putinnen körüşken vaqtında, amnistiya ya da af etilmesi talabınen siyasiy mabüsler cedvelini taqdim etken edi. Cedvelde şu cumleden ukrain rejissörı Oleg Sentsov ve qırımlı faal Oleksandr Kolçenko da bar.
Oleg Sentsov ile Oleksandr Kolçenko 2014 senesi mayıs ayında Qırımda Rusiye mahsus hızmet hadimleri tarafından yarımadada teraktlar teşkil etüvde qabaatlanaraq tutılğan ediler. 2015 senesi avgust ayında Rusiyeniñ Şimaliy-Kavkaz okrugınıñ arbiy mahkemesi, Oleg Sentsovnı Qırımdaterroristik faaliyet köstergeninde qabaatlap, 20 yılğa şiddetli rejim apsine mahküm etken edi. Oleksandr Kolçenko 10 yıllık koloniya apsine mahküm etildi. Ekisi de öz qabaatını red eteler.
«Memorial» uquqqorçalayıcı teşkilâtı Sentsov ve Kolçenkonı siyasiy mabuslar cedveline kirsetti.
