Link açıqlığı

Saatnıñ esas haberi

«Qırımnı ne unutır, ne de qaldırarmız» ‒ Avropa nazirleriniñ beyanatı


Nümünelik fotosuret
Nümünelik fotosuret

2014 senesi martnıñ 18-nde Rusiye bir sıra halqara añlaşmalarğa binaen, özü Ukraina toprağınıñ mustaqil bir qısmı dep tanığan Qırımnıñ qanunsız işğalindeki soñki adımını attı.

«Biz qanınsız işğal etilgen Qırım aqqında unutmammız», ‒ denilmekte sekiz Avropa tış işleri naziri azırlap, euobserver.com saytında derc etken ortaq maqalesinde. Maqaleniñ muellifleri arasında:

Anders Samuelsen, Danimarka tış işleri naziri;

Sven Mikser, Estoniya tış işleri naziri;

Edgar Rinkevics, Latviya tış işleri naziri;

Linas Linkevicius, Litva tış işleri naziri;

Jacek Czaputowicz, Poloniya tış işleri naziri;

Teodor Viorel Milişcanu, Romaniya tış işleri naziri;

Margot Wallström, İsveçiya tış işleri naziri;

Pavlo Klimkin, Ukraina tış işleri naziri bar.

Qanunsız ilhaqqa qarşı çıqqan Qırımnıñ tamır halqı olğan qırımtatarlarnen bir sırada, etnik ukrainler de repressiyanıñ esas nişan tahtası oldı

​«Qırımnıñ sakinleri apansızdan de-facto Moskva ükümdarlığı altına tüştiler. Olarnı Rusiye vatandaşlığını qabul etmege ve Rusiye silâlı quvetlerinde hızmet etmege mecbur etiller ve bunıñ ekisi de halqara aq-uquqnı boza. Olarğa qarşı keñ kölemli repressiya siyaseti başlatıldı, bu ise insan aqlarınıñ keniş kölemde bozuluvına, hususan, siyasiy hulâsalarğa, KHV ve mekteplerniñ qapaluvı, qatillik ve insanlarnıñ ğayıp oluvına alıp keldi. Qanunsız ilhaqqa qarşı çıqqan Qırımnıñ tamır halqı olğan qırımtatyarlarnen bir sırada, etnik ukrainler de repressiyanıñ esas nişan tahtası oldı. Onlarnen insanlar uydurılğan qabaatlavlarnen mahkeme etildi. İşte, bu şekilde Ukrainanıñ kinorejissörı Oleg Sentsov da masharalıqnen «terrorizm» içün 20 yılğa azatlıqtan marum etildi», ‒ denilmekte maqalede.

Oleg Sentsov
Oleg Sentsov

Sentsov ve 60-tan ziyade diger siyasiy mabüs tez vaqıtta azat etilmek kerek, dep qayd ete nazirler.

Ayrıca Avropa Birligi Rusiyeniñ Qırımda ötkergen saylâvlarınıñ neticesini tanımay.

«Qırımnıñ qanunsız işğali Qara deñiz regionında havfszılıq tehdidini arttıra, amma onıñ aqibetleri bölgeniñ bayağı tışına çıqa. Al-azırda Rusiyeniñ Donbasstaki tecavuzınen beraber bir sırada, o Suvuq cenk bitkeninden berli Avropada istiqrar ve telükesizlik içün esas olıp hızmet etken Avropa havfsızlığı, qaideleri printsiplerini bozmaqtadır. Qırımda olıp keçkenler Ukrainadan ğayrı bizim epimiznen de alâqalı. İşte, onıñ içün biz Qırımnı ne unutır, ne de qaldırarmız», ‒ denilmekte beyanatta.

XS
SM
MD
LG