Avropa Birligi Rusiye tarafından ilhaq etilgen Qırımnıñ azat etilüvi boyunca halqara muzakerelerge reberlik yapmaq kerek dep ayttı Avropa Parlamenti tış işler komissiyasınıñ reberi David McAllister.
O, Donbasstaki çatışma ve Qırım ilhaqını üç yolnen çezmek kerek olğanını qayd etti.
«Birinciden – BMT barıştırıcı missiyasınıñ, şu cumleden, Rusiye-Ukraina sıñırında yerleştirüv teklifini baqıp çıqmaq kerek... Ekinciden, Avropa Birligi çatışmanı yatıştırıluvında, hususan, Donbasstaki cenk meselesinde Avropa Birliginiñ mahsus siyasiy elçisini tayinlev ihtimali aqqında özüniñ teklifini kirsetmek kerek. Ve soñki madde olaraq – Qırımdaki vaziyet, Ukraina yarımadasınıñ azat etilüvi içün halqara muzakereler formatını meydanğa ketirüv fursatını talap ete», – dep ayttı McAllister.
Rusiye 2014 senesi Qırımnı ilhaq etken soñ, FSB yarımadada muntazam surette, jurnalist, faaller ve qırımtatar cemaat erbaplarını sorğulay, Ukraina tarafdarı, muhalefetçi olğan vatandaşlarnen diniy azlınlıq temsilcileriniñ evlerinde tintüvler keçirip, apiske ala. Uquq qorçalayıcılar rusiyeli küç idareleriniñ bu areketleri siyasitnen bağlı dep saya.
