Rusiye nezareti altındaki Aqmescitniñ Kiyv rayon mahkemesi, taqiqatçınıñ kelmegeni sebebinden, hırsızlanğan qırımtatar faali Ervin İbraimovnıñ işi boyunca taqiqat işlerine advokat şikâyetiniñ baqıluvını başqa künge avuştırdı, dep ayttı Qırım.Aqiqatqa advokat Emil Kurbedinov.
«Prokuratura temsilcisi de bar edi, amma taqiqat komitetiniñ temsilcisi kelmedi», – dep yaza imayeci.
Kurbedinov ayrıca, mahkemege ne içün şikâyet etkeni aqqında aytıp berdi.
«Taqiqat komiteti bu işnen alâqalı taqiqat boyunca berilgen ariza ve şikâyetlerime cevap bermey edi. Hırsızlağanlar alâ daa tapılmadı. Aman-aman eki yıl keçti. İşnen bağlı malümat, Avropa İnsan aqları mahkemesine Rusiyege qarşı, semeresiz bir taqiqat keçirgeni boyunca berilecek arizağa ilâve etilecek», – dep yaza o Facebookta.
Oturışuv martnıñ 26-na avuştırıldı.
Bütündünya qırımtatar kongressi icra şurasınıñ azası Ervin İbragimov 2016 senesi mayısnıñ 24-nde Bağçasarayda belgisiz insanlar tarafından hırsızlanğan edi. Video nezareti kamerası Rusiye yol inspektorları urbası kiygen eki adam İbragimovnıñ maşinasını toqtatıp, onı mikroavtobusqa oturtqanını qayd ete.
Qırım uquqimaye gruppası o, Rusiye akimiyeti ya da onıñ nezareti altındaki taqımlar tarafından hırsızlanğandır dep tahmin ete.
