Ukraina tış işleri naziri Pavlo Klimkin Avropa Birligi MİDiniñ yolbaşçılarına, ilhaq etilgen Qırımda ötkerilgen Rusiye saylâvalrınıñ teşkil etilüvi ve keçirilüvine alâqadar olğan 140tan ziyade şahısnıñ cedvelini teslim etti, dep haber ete ukrain KHV Ukraina MİDiniñ müdiri Oleksiy Makeyev.
«Biz cedvelni teslim ettik. Anda 140tan ziyade şahıs kirsetildi», – dep bildire«İnterfaks-Ukraina» Makeyevniñ sözlerini.
Daa evel Ukraina prezidenti Petro Poroşenko, martnıñ 18-nde ilhaq etilgen Qırımda Rusiye ötkergen saylâvlarnıñ teşkil etilüvinde iştirak etken Rusiye akimiyeti ve şahıslarğa nisbeten halqara cemaatçılıqnı sanktsiyalarnı quvetlendirmege çağırğan edi.
Martnıñ 18-nde Rusiyede ve ilhaq etilgen Qırımda prezident saylâvları ötkerildi. Resmiy Kyiv, ayrıca bir qaç halqara teşkilât ve dünyanıñ bir çoq devleti yarımadada keçken saylâvlarnı tanımay.
Ukraina MİDi daa evel martnıñ 18-nde ilhaq etilgen Qırımda ötkerilgen saylâvlar qomşu Rusiyedeki prezident saylâvlarınıñ qanuniyligini şübe doğurğanını aqqında beyan etken edi.
İlhaq etilgen Qırımda Rusiye prerzidentiniñ saylâvları tanılmaması aqqında ABniñ çetel işleri ve havfsızlıq siyaseti boyunca yüksek temsilcisi Federika Mogerininiñ beyanatında söz yürsetilmekte.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
