AB tış işleri nazirleriniñ oturışuvından evel Avropa Birligi tış işleri ve havfsızlıq siyaseti boyunca yüksek temsilcisi Federika Mogerini, Ukrainağa tolusınen siyasiy ve maddiy yardım kösterecegini ve Qırımnıñ qanunsız ilhaqı tanılmaycağını tasdıqlaycağını beyan etti.
«Men Kyivge AB tolusınen qol tutacağı, Minsk añlaşmalarınıñ amelge keçirilüvi ve qanunsız dep sayılğan Qırım ilhaqını tanımağaycağınen bağlı mesaj berdim. Ayrıca islâatlarğa tolusınen qol tutacağımız aqqında ayttım – biz nazirlernen bu aqta laf etecekmiz», – dep bildire Avropa diplomatiyasınıñ reberi Federika Mogerini, Ukrainağa «tolu siyasiy ve maddiy yardım» berilecegini beklegenini ilâve eterek.
Martnıñ 9-nda Avropa kommisiyası resmiy olaraq Ukrainağa bir milliard eurolıq makromaliyeviy yardım bermekni teklif etken edi.
Ukraina prezidenti Petro Poroşenko bu qarar Ukrainadaki «islâatlar ilerileviniñ» tanılması olğanını ayttı.
Fevral soñu- martnıñ başında Petro Poroşenko bir qaç sefer taqımınen beraber, «Ukrainanıñ Avropa Birligi ve NATOnıñ» azası oluv strategiyasınınen alâqalı «teklifni» Anayasağa «bağlap» qoymaq kerek olğanını aytqan edi. Martnıñ 16-nda cenk meydanına yaqın zonanı ziyaret etken prezident, Ukrainanıñ NATO ve Avropa Birligine kirmege ıntılğanına dair Anayasağa deñişmeler kirsetilüvi boyunca leyha azırlanmasına buyruq bergeni aqqında aytqan edi.
