Link açıqlığı

Saatnıñ esas haberi

Ukraina prezidenti Petro Poroşenko, ilhaq etilgen Qırım sakinlerine Rusiye prezidentiniñ saylâvlarını boykot etkenleri içün minnetdarlıq bildirdi.

«Ciddiy basqı yapılğanına baqmadan, bu farsta iştirak etmegen Qırım sakinlerine minnetdarlıq bildirem. Olarnı qorquzıp, mecbur ete, uydurılılğan saylâv bölüklerine ediyeler berilecek dep çağıra ediler. Lâkin olarnıñ sessiz narazılığı – Qırım – Ukrainağa bağlı olğanını kösterdi!» – dey Poroşenko.

Ukraina devletiniñ yolbaşçısı ayrıca, Kyivniñ halqara partnörlarına «qanunsız saylâvalar arfesinde olar neticesini tanılmaycağı aqqındaki açıq ve uzlaşılmaz pozitsiyasını ilân etkeni» içün teşekkür bildirdi.

Martnıñ 18-nde Rusiyede ve ilhaq etilgen Qırımda prezident saylâvları ötkerildi. Resmiy Kyiv, ayrıca bir qaç halqara teşkilât ve dünyanıñ bir çoq devleti yarımadada keçken saylâvlarnı tanımay.

Ukraina MİDi daa evel martnıñ 18-nde ilhaq etilgen Qırımda ötkerilgen saylâvlar qomşu Rusiyedeki prezident saylâvlarınıñ qanuniyligini şübe doğurğanını aqqında beyan etken edi.

İlhaq etilgen Qırımda Rusiye prerzidentiniñ saylâvları tanılmaması aqqında ABniñ çetel işleri ve havfsızlıq siyaseti boyunca yüksek temsilcisi Federika Mogerininiñ beyanatında söz yürsetilmekte.

OSCE Rusiyedeki saylâvlarnı taqip etecek Demokratik institutlar ve insan aqları Bürosının (DİİAB) közeticileri, ilhaq etilgen Qırımdaki saylâv bölüklerinde iştirak etmegenleri aqqında haber ettiler.

Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.

XS
SM
MD
LG