Vladimir Putinniñ Rusiye prezidentligine tekrar saylânuvı dünya ögünde turğan problemalarnı zorlaştıra bile. Bu aqta martnıñ 18-nde Avropa Şurası Parlament Assambleyasınıñ vitse-prezidenti, Ukraina Yuqarı Radasınıñ deputatı Volodımır Aryev beyan etti.
«Putinniñ saylâvları tarihındaki eñ yüksek netice, oña dünyanıñ eñ büyük problemalarını yaratmağa imkân berir. Rusiyeliler bügün cenkni tasdıqladı. Eger Ğarp onı (Putinni – QA) keregi kibi sıqıştırıp olamasa,bu yarın olmasa da, yaqın kelecekte olur», – dep yaza Aryev Facebookta.
Martnıñ 19-nda Rusiye Merkeziy saylâv komissiyası prezident saylâvları bülletenleriniñ aman-aman 100%ni sayıp çıqqan. İlk malümatlarğa köre, Rusiyeniñ al-azırdaki prezidenti Vladimir Putin 76%den ziyade ses toplağan.
Rusiyeniñ merkeziy saylâv komissiyası, Qırımda ötkerilgen saylâvlarda saylâvcılarnıñ ekseriyeti Putinge qol tutqanını iddia ete.
Martnıñ 18-nde aqşam Putin Moskvadaki Manejnaya meydanında öz saylâvcıları ögünde çıqış yaparaq, olarğa minnetdarlıq bildirdi. O, Rusiyeni «muvafaqiyet beklegeni» aqqında ayttı.
65 yaşındaki Vladimir Putin, evelki prezident Boris Yeltsin istifa etkeninden berli, aslında 1999 senesi dekabrniñ 31-nden itibaren Rusiyeniñ idaresinde bulıunmaqta.2008-2012 seneleri prezidentlikke Dmitriy Medvedev saylânğan edi. Qanuniy sıñırlavlardan dolayı Putinniñ özü o vaqıt prezidentlikke namzet olamağan edi. O yıllrda o baş-nazir vazifesinde çalıştı.
