Rusiye prezidentligine namzet televizion alıp barıcısı Kseniya Sobçak rusiyeli muhalefetçi Aleksey Navalnıyge saylâvlardan soñ, işbirliknen alâqalı körüşüv yapmağa teklif etti. O, prezident saylâvlarında muhalefetçiniñ iştirak etüvine musaade etilmeyuvını aqsızlıq dep tanıdı.Bu aqta Azatlıq Radiosı yazmaqta.
Navalnıy özüniñ YouTubetaki «Navalnıy LİVE» kanalındaki canlı efirinde subetleşir eken, teklifni qabul etmeyip, Sobçaknı ekiyüzlülikte ve onıñ saylâvlarğa «kirsetilmemesi» içün teşkil etilgen «ayın-oyunlarda» iştirak etkeninde qabaatladı.
Muhalefetçi ayrıca, Kseniya Sobçak Kemerovo vilâyetinde (Rusiye) saylâvlarda Navalnıynıñ közeticileri içün berilgen yollanmalarnıñ lâğu etilgende qabaatlı olğanını beyan etti.
«Saña, seniñ işleriñe köre qıymet kesecem. Olarnıñ epsi igrenç ve ekiyüzleme», – dep ilâve etti Aleksey Navalnıy. O, televizon alıp barıcısını «Putinnñ aleti» dep adlandıraraq, rusiyeli «Yedinaya Rossiya» firqasınıñ ritorikasını taqlit etip alğanında öpkeledi.
Martnıñ 18-nde yerli saatqa köre saat 20:00de Qırım ve Aqyarda Rusiye prezidenti saylâvlarında çalışqan saylâv bölükleri qapatıldı.
Martnıñ 18-nde Rusiyede prezident saylâvları ötkerile. Saylâvlar ilhaq etilgen Qırımda da teşkil etildi. Resmiy Kyiv, ayrıca bir qaç halqara teşkilât ve dünyanıñ bir çoq devleti yarımadada keçken saylâvlarnı tanımay. Qırım.Aqiqat metin yayınlavını yürseterek, Qırımda olıp keçkenlerni taqip ete.
Daa evel ilhaq etilgen Qırımda Rusiye prezidenti saylâvları çerçivesinde saylâvcılarğa yapılğan tazyıq faktları aqqında haber etilgen edi.
Qırım uquqimaye gruppası Qırım sakinlerine daa evel tazyıq yapılğanını qayd etip, hususan işhanelerniñ yolbaşçıları qırımtatar hadimleri saylâvlarğa qatnaşmasa işten boşatılacaq dep tehdit etken.
Ukraina MİDi martnıñ 18-nde ilhaq etilgen Qırımda ötkerilgen saylâvlar qomşu Rusiyedeki prezident saylâvlarınıñ qanuniyligini şübe doğurğanını beyan ete.
Yanvar ayında Qırımtatar halqı Milliy Meclisinıñ reisi Refat Çubarov çeşit millet mensübi olğan Qırım sakinlerini Rusiye prezidenti saylâvlarını boykot etmege çağırğan edi.
Fevralniñ 16-nda Ukraina prezidenti Petro Poroşenko dünya cemaatçılığını ilhaq etilgen Qırımda Rusiye prezidentiniñ kelecekteki saylavlarınıñ neticelerini tanımamağa çağırğan edi.
İlhaq etilgen Qırımda Rusiye prerzidentiniñ saylâvları tanılmaması aqqında ABniñ çetel işleri ve havfsızlıq siyaseti boyunca yüksek temsilcisi Federika Mogerininiñ beyanatında söz yürsetilmekte.
OSCE Rusiyedeki saylâvlarnı taqip etecek Demokratik institutlar ve insan aqları Bürosının (DİİAB) közeticileri, ilhaq etilgen Qırımdaki saylâv bölüklerinde iştirak etmegenleri aqqında haber ettiler.
Danimarka, Estoniya, Latviya, Litva, Poloniya, Romaniya, İsveç ve Ukraina MİDleriniñ yolbaşçıları Rusiye Qırımnı ilhaq etkenine dört yıl tolğanı munasebetinen umumiy beyanat azırladılar. Metinde qayd etilgenine binaen, Avropa tış işleri nazirleri «Qırımnıñ halqara kün tertibinden çoyulmasına musaade etmeycekler».
Felemenk ve Norvegiya MİDleri martnıñ 18-nde ilhaq etilgen Qıroımda ötkerilgen Rusiye prezidentiniñ saylâvlarını tanımağanı aqqında beyan etken edi.
