Qırımtatar milliy areketi azaları martnıñ 18-nde ilhaq etilgen Qırımda ötkerilgen Rusiye prezidentiniñ saylâvaları ketişatını nazar-itibarğa almaylâr. Bu aqta Qırım.Aqiqatqa qırımtatar milliy areketiniñ faali Narima Celâl ikâye etip berdi.
«Bizler Ukraina qanunı ve siyasiy vaziyet ceetinden bu saylâvlar epimiz içün nenen biteceginen bağlı añlatuv işleri keçirdik. Qırımtatarlarnı imkânı olğanı qadar saylâv bölüklerinden uzaqça olmağa, yani: dostlarına musafirlikke barmağa, ailesinen beraber vaqıt keçirmege, ya da birisiniñ işi bar ise – işine barmağa çağırdıq», – dedi faal.
Celâl közetkenine köre, saylâv bölükleri qalabalıq degil. Ancaq, bir çoq şeerlerde saylâv bölükleri yanında aşayt yarmalıqları, balalar içün bedava eglenceler teşkil etilgen.
«İnsanlarnı saylâv bölüklerine celp etmek içün bütün imkânalrnı qullanalar», – dep ayta faal.
Daa evel ilhaq etilgen Qırımda Rusiye prezidenti saylâvları çerçivesinde saylâvcılarğa yapılğan tazyıq faktları aqqında haber etilgen edi.
Qırım uquqimaye gruppası Qırım sakinlerine daa evel tazyıq yapılğanını qayd etip, hususan işhanelerniñ yolbaşçıları qırımtatar hadimleri saylâvlarğa qatnaşmasa işten boşatılacaq dep tehdit etken.
Martnıñ 18-nde Rusiyede prezident saylâvları ötkerile. Saylâvlar ilhaq etilgen Qırımda da teşkil etildi. Resmiy Kyiv, ayrıca bir qaç halqara teşkilât ve dünyanıñ bir çoq devleti yarımadada keçken saylâvlarnı tanımay. Qırım.Aqiqat metin yayınlavını yürseterek, Qırımda olıp keçkenlerni taqip ete.
Ukraina MİDi martnıñ 18-nde ilhaq etilgen Qırımda ötkerilgen saylâvlar qomşu Rusiyedeki prezident saylâvlarınıñ qanuniyligini şübe doğurğanını beyan ete.
Yanvar ayında Qırımtatar halqı Milliy Meclisinıñ reisi Refat Çubarov çeşit millet mensübi olğan Qırım sakinlerini Rusiye prezidenti saylâvlarını boykot etmege çağırğan edi.
Fevralniñ 16-nda Ukraina prezidenti Petro Poroşenko dünya cemaatçılığını ilhaq etilgen Qırımda Rusiye prezidentiniñ kelecekteki saylavlarınıñ neticelerini tanımamağa çağırğan edi.
İlhaq etilgen Qırımda Rusiye prerzidentiniñ saylâvları tanılmaması aqqında ABniñ çetel işleri ve havfsızlıq siyaseti boyunca yüksek temsilcisi Federika Mogerininiñ beyanatında söz yürsetilmekte.
OSCE Rusiyedeki saylâvlarnı taqip etecek Demokratik institutlar ve insan aqları Bürosının (DİİAB) közeticileri, ilhaq etilgen Qırımdaki saylâv bölüklerinde iştirak etmegenleri aqqında haber ettiler.
Danimarka, Estoniya, Latviya, Litva, Poloniya, Romaniya, İsveç ve Ukraina MİDleriniñ yolbaşçıları Rusiye Qırımnı ilhaq etkenine dört yıl tolğanı munasebetinen umumiy beyanat azırladılar. Metinde qayd etilgenine binaen, Avropa tış işleri nazirleri «Qırımnıñ halqara kün tertibinden çoyulmasına musaade etmeycekler».
Felemenk ve Norvegiya MİDleri martnıñ 18-nde ilhaq etilgen Qıroımda ötkerilgen Rusiye prezidentiniñ saylâvlarını tanımağanı aqqında beyan etken edi.
