Ukraina Yuqarı Radasınıñ birinci vitse-spikeri İrina Geraşçenko ilhaq etilgen Qırım sakinlerine Rusiye prezidenti saylâvlarını boykot etüv ricasınen muracaat etti. Bu aqta Geraşçenko martnıñ 16-nda özüniñ Facebook saifesinde yazdı.
«Kreml Qırımnıñ çalınğanını qanuniyleştirmek istey, bu sebepten – hırsız ve qatil – devlet içün hırsızlanğan yarımadada saylâvlarğa kütleviy surette qatnaşqanlarını köstermek, Putin içün, hususan anda qol tutulğanı pek muim. Bizim işğal altında qalğan vatandaşlarımızğa muracaat etemiz – bu saylâvlarnı boykot etiñiz, onıñ biznen alâqası yoq. Sizler öz devletiñiz olğan Ukraina akimiyetini saylâmaq kereksiz ve saylâycaqsız», – dep yaza Geraşçenko.
Rusiye prezidentiniñ saylâvları 2018 senesi martnıñ 18-ne – yani Qırım Rusiye tarafından ilhaq etilgen künge tayin etildi. Saylâvlarda: Sergey Baburin, Pavel Grudinin, Vladimir Jirinovskiy, Vladimir Putin, Kseniya Sobçak, Maksim Suraykin, Boris Titov ve Grigoriy Yavlinskiy olaraq, sekiz namzet iştirak etecek.
Fevralniñ 16-nda Ukraina prezidenti Petro Poroşenko dünya cemaatçılığını ilhaq etilgen Qırımda Rusiye prezidentiniñ kelecekteki saylavlarınıñ neticelerini tanımamağa çağırdı.
İlhaq etilgen Qırımda Rusiye prerzidentiniñ saylâvlarını tanılmaması aqqında ABniñ çetel işleri ve havfsızlıq siyaseti boyunca yüksek temsilcisi Federika Mogerininiñ beyanatında söz yürsetilmekte.
