Rusiye Qırım yarımadasını dört yıl evelsi ötkerilgen qanunsız referendumden son özüne qoşıp (ilhaq) etip aldı. Bu aqta «referendım» keçirilgen martnıñ 16-nda Türkiye tış işleri Nazirligi haber etmekete.
«Biz işbu areket aqibetinde meydanğa kelgen vaziyetni tanımağanımıznı, bu halqara uquqnıñ bozıluvı olğanını ve Ukrainanıñ topraq bütünligi ve suverenitetini qol tutqanımıznı bir daa tekrarlaymız. Qırımdaki vaqialarnı, hususan, yarımadanıñ tamır halqı olğan qırımtatarlarnen bağlı vaziyetni diqqatnen taqip etmege devam etecemiz», – denilmekte haberde.
Daa evel Ukraina tış ileri naziri Pavlo Klimkin Rusiye prezidentligine namzet olğan Kseniya Sobçaknıñ ilhaq etilgen Qırımda tekrar bir referendum keçirilmesinen alâqalı teklifini havflı teklif dep adlandırğan edi.
ABD Devlet departamentiniñ matbuat kâtibi Hezar Nauert martnıñ 15-nde, Rusiye Ukraina toprağını ilhaq etkeniniñ üstüne qapatmaq içün, dört yıl evelsi Ukrainada qanunsız «referendum» keçirgen edi, dep qayd etken edi.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
