Aqyar sakinleri, martnıñ 18-nde qomşu Rusiyeniñ prezidentine rey bermek içün saylâv noqtalarına kelgenleri içün, «referendum» yıllığına bağışlanğan «Ebediyen Rusiye ile» adlı hatıra medali alacaqlar. «Novıy Sevastopol» Kreml nezareti altındaki bütünqırım referendumını keçirüv boyunca şeer komissiyasınıñ reisi Valeriy Medvedevniñ bu aqtaki sözlerini bildirmekte.
«Bu medal, bizler dört yıl evel referendum ötkergenimizniñ timsali. Biz er yıl bu vaqianı minnetdarlıq, yarlıqlar kibi çeşit türlü mükâfatlarnen nişanlaymız. Bu yıl Rusiyege qaytqanımıznı timsal etken hatıra medalini berüv ğayesini veteranlar şurası keñişinde şeerimizniñ vatanperveri İvan Yermakov teklif etti. Er kes bu fikirni begendi ve onıñ amelge keçirilüvi maña avale etildi», – dep bildire neşir Medvedevniñ sözlerini.
Onıñ sözlerine köre, hatıra işaretiniñ muzakeresinde Aqyar parlamenti, veteranlar, cemaatçılar, «referendum» ötkeriv komissiyasınıñ azaları iştirak etti dep yaza neşir. Artıq medal yetecek miqdarda yaptırılaraq, saylâv noqtalarına teslim etilecek.
Rusiye prezidentiniñ saylâvları 2018 senesi martnıñ 18-ne – yani Qırım Rusiye tarafından ilhaq etilgen künge tayin etildi. Saylâvlarda: Sergey Baburin, Pavel Grudinin, Vladimir Jirinovskiy, Vladimir Putin, Kseniya Sobçak, Maksim Suraykin, Boris Titov ve Grigoriy Yavlinskiy olaraq, sekiz namzet iştirak etecek.
Fevralniñ 16-nda Ukraina prezidenti Petro Poroşenko dünya cemaatçılığını ilhaq etilgen Qırımda keçirilecek Rusiye prezidenti saylâvlarınıñ neticesini tanımamağa çağırdı.
