Martnıñ 14, çarşembe künü, Rusiye küç idaresiniñ hadimleri Sudaq civarındaki Qapsihor (Morskoye) köyünde yaşağan qırımtatar faali Rustem Useinovke ruhset almadan kütleviy tedbirlerde iştirak etmesini yasaqlağan tenbiyelev vesiqası bermege areket etken. Bu aqta Qırım.Aqiqatqa siyasetşınas qırımtatar faali Lenora Dülber ikâye etip berdi.
«Rustem Useinovnıñ yanına 5 maşna polis hadimi kelip, qanuniy yolnen ruhset almadan kütleviy tedbirlerde iştirak etmesini yasaqlağan tenbiyelev vesiqası bermege areket etti. Useinov kesen-kes iç bir vesiqanı almaycağı ve imzalamaycağını ayttı. O, bu qabaatlavlarnı boş olğanı ve olarğa qulaq asmamaq kerek dep sayğan», – dedi Dülber.
Onıñ sözlerine köre, Useinov «26 fevral işi» mahkeme oturışuvlarını ziyaret etken faallerden biri eken.
«Men bellesem, polislerniñ ziyareti bunen bağlı», – dep ilâve etti o.
Rusiye küç idaresi hadimleriniñ bu hususnen alâqalı kütleviy izaatı yoq.
Qırım ilhaqından soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı
