Link açıqlığı

Saatnıñ esas haberi

Poroşenko G7 devletlerini Qırımda Rusiye saylâvlarını tanımamağa çağıra


Petro Poroşenko
Petro Poroşenko

Ukraina prezidenti Petro Poroşenko G7 devletlerini Qırımda keçecek Rusiye prezidenti saylâvlarını takbih etmege ve tanımamağa çağırdı.

Ukraina devleti yolbaşçısınıñ matbuat hızmeti haber etkenine köre, bu aqta Poroşenko Ukrainada qayd etilgen G7 (Büyük yedi devlet) devletleri ve Avropa Birliginiñ elçilerinen yapqan körüşüvi esanasında söz yürsetkendir.

«Men martnıñ 18-nde ötkerilecek Rusiye saylâvlarını muzakere etmek ister edim. Sizlerniñ Qırımda Rusiye saylâvlarını takbih etip, tanımamañıznen bağlı qatiy beyanatıñız bizim içün fevqulâde muim meseledir», – dep bildire matbuat hızmeti Poroşenkonıñ ABD, Yaponiya, Almaniya, Büyük Britaniya, Frenkistan, İtaliya ve Canada elçilerinen yapqan körüşüvinde aytqan sözlerini.

Poroşenko ayrıca körüşüvde iştirak etken AB Temsilciliginiñ yolbaşçısı Hugues Mingarellige muracaat eterek, oña ve Avropa komissiyasınıñ vitse-prezidentine «Avropa Birliginiñ küçlü pozitsiyası» içün minnetdarlıq bildirdi.

«Monitoring keçirmek maqsadınen siziñ vatandaşlarıñızğa Qırımnıñ ziyaret etilmesi yasaqlansa pek muim olur edi», – dep qayd etti Ukraina prezidenti, hususan, Frenkistan, Avstriya ve Finlândiya temsilcileri aqqında söz ketkenini ilâve eterek.

Rusiye prezidenti saylavlarınıñ ötkerilmesi 2018 senesi mart 18-ne – Qırım ilhaqınıñ yıllığı qayd etilgen künge tayın etildi.

Martnıñ 1-nde Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavlarınıñ qanuniyligini tanımamağa çağırdı.

XS
SM
MD
LG