Qırımtatar Milliy Meclisiniñ reisi Refat Çubarov martnıñ 13-nde Qırımtatar Milliy Meclisi liderleriniñ çetel devletlerniñ elçilerinen keçirgen ananeviy körüşüvde, Ukraina Anayasasınıñ Qırımnen bağlı qısmında yapılacaq deñişmeler ve qoşmalar leyhasınıñ esas printsipleri aqqında ikâye etip berdi.
«Qırım muhtariyetiniñ mahsus statusınıñ menbası qırımtatar halqınıñ öz taqdiri tayin etüv aqqına esaslana. Qırım muhtariyetiniñ Anayasası, muhtariyetniñ temsiliy orğanı tarafından qırımtatar Qurultayınen uyğunlaştırılaraq qabul etilmeli. Qırımtatar tili devlet tilinen beraber, qanunlar belgilegen diger istisna saalardan ğayrı, ictimaiy ayatnıñ er bir saasında qullanılacaq», – dedi Çubarov.
Onıñ sözlerine köre, ayrıca, Ukraina Anayasasında kirsetilmek kerek olğan daa bir printsip, «qırımtatar halqınıñ temsil etilmesiniñ» temin etilmesinen alâqalı. Ondan da ğayrı, esas qanunda qırımtatar halqınıñ yuqarı temsiliy orğanlarını «tamır halq belgilegen qaydelerge köre» pekitmek kerek.
Martnıñ 13-nde Kyivde qırımtatar halqı Milliy Meclisiniñ liderleri ve çetel devletleriniñ elçileri arasında ananeviy körüşüvi ötkerildi. Anda Milliy Meclis liderleri diplomatlarğa Qırımnıñ azat etilüvinen bağlı adımlar ve Qırımtatar Muhtariyeti sıfatında yarımadanıñ ğayrıdan integratsiyası aqqında malümat berdiler.
Tedbirde Qırımtatar Milliy Meclisiniñ reisi Refat Çubarov, qırımtatar halqınıñ işleri boyunca Ukraina prezidentiniñ vekaletlisi, halq deputatı Mustafa Cemilev, ABD, Türkiye, Büyük Britaniya ve diger devletlerniñ elçileri iştirak etti.
Bıltır Anayasa komissiyasınıñ iş gruppası Ukraina Anayasasına Qırım azat etilgen soñ onıñ statusınen bağlı tüzetmeler kirsetilüvi üzerinde çalışıp başladı. Tüzetüvler yarımadanıñ tamır halqı olğan qırımtatarlarınıñ Ukraina devleti terkibinde öz Vatanında taqdirini belgilev aqqı berile.
Anayasa komissiyasınıñ alt iş gruppası Ukraina Anayasasınıñ onuncı maddesine tüzetüv ve ilâveler kirsetüvnen bağlı azırlıqlarını ta 2017 senesi noyabr ayında bitirgen edi.
