Ukraina ve çetel sinoptikleri tahminlerine köre, bu aftanıñ soñuna doğru Ukrainanıñ büyük bir qısmında ava suvuycaq ve qar yağacaq. Qış avası martnıñ 17 ve 18-nde keri qaytması beklenile.
«Kene de artktikadan kelgen suvuq kütle basıp başlaycaq ve ava arareti -10...-12 derecegece tüşecek, şimaliy-şarq qısmında ise, -12...-16 derecege qadar tüşecek. Cenübiy-ğarbiy yönelişten ise, bizim musafir olaraq küçlü yağışlar ketirecek tsiklon kelmekte. Şimaliy rüzgârnen cenübiy tsiklon arasındaki çatışma furtunalı yelni kötere. Bu tahminler vaqıtsızdır sayıla ve daa da tafsilâtlı malümat berilecek», – dep tenbiyeley sinoptik Natalya Didenko.
Ayaz afta soñunında bütün Ukrainanı qaplamaycaq dep israr ete Norvegiya meteorologiya institutı. Şimal ve şimaliy-şarqta (mesela, Kyiv ve Harkivte) suvuqlar tatil künlerinden soñ da devam etecek, lâkin cenübiy vilâyetler (Odessa ve qomşu vilâyetlerde) suvuq is etilmeycek esap. Qalğan territoriyalarda meselâ, Dniproda olğanı kibi, ava pek suvumaycaq ve çoq devam etmeycek.
Mart ayınıñ başında Qırımda ava şartları pek deñişken edi. Böylece, ava bozulğanı sebebinden martnıñ 1-nde 17 mesken yeri yani 4 biñge yaqın sakin elektriksiz qalğan edi. «Krımenergo» martnıñ 2-nde yarımadada elektriknen teminlev tiklengeni boyunca esabat bergen edi.
Martnıñ 1-nde küçlü qar yağğanı sebebinden Aqmescit avalimanında 14 uçaq seferi keçiktirilgen edi.
