Ukraina prezidenti Petro Poroşenko, Avropa Birligi Rusiyege qarşı sanktiyalarnı devam ettirgeni içün Ukraina minnetdar olğanınını beyan etti. Onıñ sözlerine köre, bu qarar Ukrainanen birdemlik olğanına delâlet ve iqtisadiy sıñırlavlar semereli olğanını köstermekte.
«Aslında bu, Rusiyeni muzakere masası başına oturtmaq ve Rusiye tecavuzı toqtatıluvında bir ilerileme temin etmek içün yekâne bir mehanizmdir. Kerekli şekilde Avropa Birligi, ABD, Canada, Avstraliya, Japoniya ve diger bir çoq devletlerniñ koordinatsiya etilgen sanktsiyaları, Rusiyeniñ Ukrainağa qarşı tecavuzı bitkence quvetlendirilerek, devletimizniñ topraq bütünligi tiklengence devam etecek. Qırım da şu cumleden olğanını qayd etem», – dedi Poroşenko, hususan bu qararnıñ AB tış işleri ve havfsızlıq siyaseti boyunca yuqarı vekili Federika Mogerininiñ Ukrainanı ziyaret etken vaqıtta qabul etilüvini timsaliy olğanını qayd etti.
Avropa birligi Şurası martnıñ 12-nde, Ukraina topraq bütünligi, suvereniteti ve mustaqilligine qast etüv ve bozıluvına alâqadar olğanlarğa qarşı AB tarafından kirsetilgen sanktsiyalarnı daa yarım yılğa uzattı. Sanktsiyalar 150 şahıs ve 38 teşkilâtnen alâqalı olaraq, 2018 senesi sentâbrniñ 15-ne qadar devam etecek.
Sıñırlav tedbirleri 2014 senesi mart ayında Rusiyeniñ Ukrainağa qarşı yapqan tecavuzına Avropa birliginiñ bir cevabı olaraq kirsetilgen edi.
Buña bir cevap olaraq AB daa bir sıra sanktsiyalar kirsetken edi, hususan: 2018 senesi iyülnin 31-ne qadar devam etecek Rusiye iqtisadiyatınıñ muayyen saalarına qarşı kirsetilen iqtisadiy sanktsiyalar; Rusiye tarafından yarımadanıñ qanunsız ilhaqına qarşı Qırım ve Aqyarda üküm sürecek sıñırlav tedbirler. Olar 2018 senesi iyunniñ 23-ne qadar devam etecek.
Buña beñzer sanktsiyalarnı ABD ve «Yedi devlet gruppası»na kirgen diger devletlernen beraber daa bir qaç devlet kirsetti.
