Rusiye prezidenti Vladimir Putin bir daa Qırım Ukrainağa «iç bir şartlarda» keri qaytarılmaycağı aqqında ayttı. Bu aqta o, «Rossiya» kanalınıñ jurnalisti Andrey Kondraşovnıñ «Putin» adlı filminde söz yürsete.
«Ne aytasıñız ya, aqıldan azdılarmı, yoqsa? İç bir şart yoq ve iç bir vaqıt olmaz», – dey Putin, Qırım Ukrainağa ne şartlarda keri qaytarılması mümkün degen sualge.
Jurnalist Dmitriy Kiselöv Andrey Kondraşovnıñ «Putin» adlı filmini «Vkontakte»de derc etken. Kiselövnıñ sözlerine köre, yañı filmde prezident Vladimir Putin, «balalıq ve gençlik devrindeki arqadaşları, mektep ocası, KGBdaki meslekdeşleri ve Staside çalışqan zenaatdaşları aqqında ikâye ete eken».
Putin «tarihiy noqta-ı nazardan» Qırımnıñ kimge ait olğanına dairmesele 2016 senesi qapatılğanı aqqında aytqan edi. «Evelki sistemağa qaytmaq degen şey umumen yoq. İç bir şekilde», – degen edi o, o vaqıtta.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
