Link açıqlığı

Saatnıñ esas haberi

Putinniñ temsilcisi Çubarovnıñ Qırımdan rusiyelilerniñ köçürilüvinen bağlı beyanatına cevap berdi


Rusiye prezidentiniñ Qırımdaki daimiy temsilcisi Georgiy Muradov Milliy Meclis reisi Refat Çubarovnıñ Qırımdan rusiyelilerniñ köçürilüvinen bağlı beyanatına «irişilmez hayal» dep ayttı. Bu aqta RİA Novosti haber ete.

«Belli mesele, Çubarovnıñ bulançıq añında peyda olğan hayalları, irişilmez hayallardır ve Qırım ealisi bunı mizahnen qabul etip: Ukrainada o derece açuvlanıp, ukrainalılarnı Ukrainadan köçürmege teklif etecek muacir tapılır ekenmi? - degen sual bereler. Men bellesem, böyle fikir kimseniñ aqlına bile kelmez. Ancaq Çubarovnıñ aqlına kelgen, işte», – dep beyan etti Muradov.

Martnıñ 10-nda Qırımtatar Milliy Meclisiniñ reisi Refat Çubarov, 2014 senesinden soñ Qırımğa köçüp kelgen rusiyelilerniñ episi yarımadanı terk etmek kerek olacağını beyan etken edi.

«Rusiyelilerniñ episi bir şeyni bilmeli, aqıllarınıñ ucunda bir niyetleri bar ise, ya da, Allah köstermesin, eger olar artıq devamlı yaşamaq içün Rusiye işğal etken Qırımğa köçken olsa. Olar andan köçip ketmege mecbur olacaqlarını bilmeli. Bunın başqa bir yolu yoq», – dep aytqan edi Çubarov «5 kanal» efirinde.

Rusiyeli küç idaresiniñ hadimleri Refat Çubarovnıñ Qırımğa kirişini yasaqlağan edi. Bu adise 2014 senesi iyülnin 5-nde o, Milliy Meclisniñ Hersonda keçken toplaşuvından keri qaytqan vaqıtta yüz bergen edi. Yarımadanıñ memuriy sıñırında o zaman Çubarovnı, Qırımnıñ o devirdeki prokurorı, Rusiye tayin etken Natalya Poklonskaya qarşılağan edi. O, «ekstremistik faaliyetnen oğraşmaq yasaq» olğanına dair tenbiyelevni oqup bergen edi. Bundan soñ, rusiyeli sıñırcılar Milliy Meclis reisine 5 yıl devamında Rusiye territoriyasına kirişini yasaqlağan bildirüv kağıtını bergen ediler.

Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.

XS
SM
MD
LG