Qırım industrial-pedagogika universitetiniñ yolbaşçıları ilhaq etilgen Qırımda ötkerilcek Rusiye prezidentiniñ saylâvlarında iştirak etmesi içün «talebelerge bayağı bir tazyıq ete» dep ikâye ete Qırımtatar Milliy Meclisiniñ reisi Refat Çubarov «Amerika sesi»niñ rusiyeli hızmetine bergen intervyusında.
Onıñ sözlerine köre, oquv yurtınıñ yolbaşçıları, eger talebeler saylâvlarda kerek ictimaiy faallik köstermegen taqdirde, olar kelecekte oquvnında zorluq çekeceklerinen tehdit ete eken.
«Balalarnen ana-babalarnıñ cedvellerini tizgen ve olarnen subet keçirgenocalarğa nisbeten de, aynı basqılar yapıla. İnsanlarnı qırımtatar iş adamları vastasınen de işke celp etmege areket eteler. Putin ile onıñ etrafındakiler içün, Qırımda insanlarnıñ yalıñız kelgeni degil de, Rusiyege nisbeten, şu cumleden qırımtatarlarnıñ da daa ziyade kelgenleriniñ kösterilmesi muim», – dedi Çubarov.
Daa evel rusiyeli siyasetşınas, Sankt-Peterburg Avropa universitetiniñ siyasiy ve ictimaiy ilimer fakultetiniñ professorı Vladimir Gelman Qırım.Aqiqatqa bergen izaatında, Rusiye prezidentiniñ memuriyeti saylâvlarda Qırım sakinleriniñ 70% iştirak etecegini beklegeni aqqındaki fikrini beyan etken edi.
Rusiye prezidenti saylavlarınıñ ötkerilmesi 2018 senesi mart 18-ne – Qırım ilhaqınıñ yıllığı qayd etilgen künge tayın etildi.
Martnıñ 1-nde Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavlarınıñ qanuniyligini tanımamağa çağırdı.
