Rusiyedeki «Memorial» uquqimaye merkezi Yaltalı «Hizb ut-Tahrir işi» iştirakçileri olğan Muslim Aliyev, Enver Bekirov, Vadim Sirük, Refat Alimov ve Arsen Cepparovnı siyasiy mabüs dep tanıdı. Bu aqta«Memorial»nıñ saytında söz yürsetilmekte.
«Bizim fikrimizce, bu esassız bir qabaatlavlar. Mahkeme etilgenler terroristik faaliyetnen oğraşmaq çette tursın, cemaatçılıq içün havflı olğan er angi bir areket bile yapmağanlar», – denilmekte uquqimaye merkeziniñ haberinde.
Uquqimayeciler Qırımnı «Rusiye tarafından ilhaq etilgen» dep saya ve Yaltalı «Hizb ut-Tahrir işi» iştirakçilerini tez vaqıtta azat etilgenni talap eteler.
2016 senesi fevral-mart ayları arasında Yaltada Arsen Cepparov ve Refat Alimov, Emir-Üsein Kuku, Muslim Aliyev, Enver Bekirov ve Vadim Sirük tutulıp alınğan edi. Olar Rusiyede yasaqlanğan «Hizb ut-Tahrir» islâm siyasiy teşkilâtına alâqası olğanındsa qabaatlana.
Rusiye arbiy mahkemesi Yaltalı «Hizb ut-Tahrir işi» mahkemelerini Aqmescitte köçme oturışuvda keçire edi. Ondan soñ tevqif etilgen qırımlılar Rostov-na-Donu şeerine yollanıldı.
Yanvarniñ 24-nde Ukraina tış işleri nazirligi Rusiyeden Yaltalı «Hizb ut-Tahrir işi» altı iştirakçisiniñ azat etilmesi talap etken edi.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
