Martnıñ 1-nden başlap Hersondan, Qırım memuriy sıñırına 10 km mesafede yerleşken Vadim stantsiyasına qadar eki dane tren qatnap başladı. Bu aqta Qırım.Aqiqatqa Ukraina prezidentiniñ Qırım MC temsilcisi Boris Babin haber etti.
«Bu şeerlerarası bir tren sayıla, bu muvaqqat bir usul ve o bilhassa qırımlılar içün de hızmet etecek. Çünki o suratlı soyu, daa ziyade komfortlı ve Kyivnen Harkiv trenleriniñ keliş saatine keliştirildi», – dep haber etti Babin.
«Herson – Vadim» treni er kün saat 9.13 ve 14.14 köçe. Keri ise saat 11.44 ve 16.45 qayta.Areket cedveline köre tren yolculuğı 2 saat 5 daqqa süre.
Herson demiryol vokzalında Qırım.Aqiqat muhbirine yolculıq fiyatı 25 grivna olğanı bildirilgen.
Babinniñ sözlerine köre, mart ayınıñ ortasından itibaren Vadim stantsiyasından «Çaplınka» KÇKN qadar resmiy avtobus ve taksiler qatnap başlaycaq eken.
Qırım Rusiye tarafından ilhaq etilgeni sebebinden 2014 senesi dekabrtniñ 27-nden başlap «Ukrzaliznıtsâ» havfsızlıq temin etmek maqsadınen Qırımnen, şu cumleden yarımadanen olğan halqara demiryol bağını kesken edi. Qırım yönelişinde qatnağan trenler yalıñız Novoalekseyevka ve Herson stantsiyalarına qadar qatnay ediler.
Qırım Rusiye tarafından ilhaq etilgen soñ, 2014 senesi Ukrainanıñ qıta qısmınen yarımada arasında memuriy, amma aslında kerçek bir «sıñır» peyda oldı. Memuriy sıñırda «Kalançak», «Çaplınka» ve «Çonğar» olaraq üç kiriş-çıqış noqtası çalışıp başladı.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
