Avropa Birliginiñ çetel meseleleri Şurası martnıñ 19-nda ötkerilecek nevbetteki oturışuvında Qırım ilhaqınıñ dört yıllığı ve Rusiyedeki prezident saylâvları çerçivesinde Ukrainanıñ vaziyetini muzakere etecek. Bu aqta AB yönetüv müessiselerine esaslanğan «Ukrinform» yazmaqta.
«Tış işleri nazirleri Ukrainanen bağlı fikir alış-verişi yapalar. AB yuqarı temsilcisi Federika Mogerini nazirlerge martnıñ 11-12-de Kyivni ziyaret etkeni aqqında malümat berecek. AB Şurası Ukrainadaki soñki vaqialarnen, hususan islâat esnasını muzakere etecek», – dep bildire neşir AB Şurasındaki menbaanıñ sözlerini.
Martnıñ 12-nde Kyivde Avropa Birliginiñ çetel işleri boyunca yuqarı vekili Federika Mogerini Kyivni ziyareti çerçivesinde Ukraina prezidenti Petro Poroşenko ile körüşecek. Körüşüv Rusiyege qarşı sanktsiyalar Qırımda ötkerilecek Rusiyeniñ qanunsız saylâvları muzakere etilecek.
Rusiye prezidenti saylavlarınıñ ötkerilmesi 2018 senesi mart 18-ne – Qırım ilhaqınıñ yıllığı qayd etilgen künge tayın etildi.
Ukraina prezidenti Petro Poroşenko dünya cemaatçılığını ilhaq etilgen Qırımda Rusiye prezidentiniñ kelecekteki saylavlarınıñ neticelerini tanımamağa çağırdı.
Martnıñ 1-nde Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavlarınıñ qanuniyligini tanımamağa çağırdı.
