OSCE ve BMTdeki ukrain missiyası Vienada, Rusiyedeki saylâvlarnı taqip etecek Demokratik institutlar ve insan aqları Bürosının (DİİAB) közetüv missiyası, BMT Assambleyasınıñ Rusiye Qırımnı ilhaq etkenini tanımamasınen bağlı rezolütsiyasına qatiyen uymasını beklemekte.
Bu aqta diplomatik missiyanıñ Twitterdeki haberinde söz yürsetilmekte.
«Bizler, Rusiyedeki saylâvlarnı taqip etecek al-azırdaki DİİAB Közetüv missiyası qatiyen OSCE ve BMT Baş Assambleyasınıñ 68/262 «Ukraina topraq bütünligi» rezolütsiyasına köre, Ukrainanıñ ayrılmaz parçası olğan Qırım MC ve Aqyar şeeriniñ statusı deñişüviniñ iç bir şekilde tanılmamasına dair printsip ve mecburiyetleri çerçivesinde areket etecegini beklemektemiz», – denilmekte haberde.
Martnıñ 7-nde Avropa parlamenti, Rusiye ve Azerbaycanda ötkerilecek prezident saylâvlarına resmit közeticiler yollacağını planlaştırmağanını beyan etken edi.
Rusiye prezidenti saylavlarınıñ ötkerilmesi 2018 senesi mart 18-ne – Qırım ilhaqınıñ yıllığı qayd etilgen künge tayın etildi.
Ukraina prezidenti Petro Poroşenko dünya cemaatçılığını ilhaq etilgen Qırımda Rusiye prezidentiniñ kelecekteki saylavı neticelerini tanımamağa çağırdı.
Martnıñ 1-nde Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavlarınıñ qanuniyligini tanımamağa çağırdı.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
