Qırımtatar Milliy Meclisiniñ reisi Refat Çubarov haber etkenine binaen, Anayasa komissiyası Ukraina devletiniñ Qırım statusınen bağlı Esas qanunda kirsetilecek tüzetmelernen daa oğraşmağan.
Bu aqta o martnıñ 8-nde «5 kanal» efirinde söz yürsetti.
«Eger biz protsedurağa uyğun şekilde baqqan olsaq (tüzetmelerni –QA) ideal olur edi, yani Anayasağa tüzetmeler kirsetilgende, eki sessiya ötkerilmeli ve Anayasa mahkemesi musbet hulâsa çıqarmalı», – dep ayttı Çubarov.
Onıñ sözlerine binaen, parlamentniñ bu seferki sessiyasında işbu tüzetmelerni Yuqarı Rada körip çıqmasına teslim etilmesi, rey berilmesi ve Anayasa mahkemesine yollanılması pek muim. Çubarov qayd etkenine köre, bunıñ içün pek az vaqıt qala.
Bıltır Anayasa komissiyasınıñ iş gruppası Ukraina Anayasasına Qırım azat etilgen soñ onıñ statusınen bağlı tüzetmeler kirsetilüvi üzerinde çalışıp başladı. Tüzetüvler yarımadanıñ tamır halqı olğan qırımtatarlarınıñ Ukraina devleti terkibinde öz Vatanında taqdirini belgilev aqqı berile.
Anayasa komissiyasınıñ alt iş gruppası Ukraina Anayasasınıñ onuncı maddesine tüzetüv ve ilâveler kirsetüvnen bağlı azırlıqlarını ta 2017 senesi noyabr ayında bitirgen edi.
Ukraina prtezidenti Petro Poroşenko fevralniñ 28-nde iş gruppasınıñ Ukraina Anayasasınıñ onuncı maddesine Qırım Muhtar Cumhuriyetine dair tüzetüv ve ilâveler kirsetüvnen bağlı tekliflerinen tanış olmağanı aqqında haber etken edi.
Ukraina informatsion siyaseti naziriniñ birinci muavini Emine Ceppar, qırımtatar muhtariyetiniñ «separatizmnen iç bir alâqası olmağanını» ve onıñ meydanğa ketirilüvi tamır halqnıñ, 2014 senesi Ukraina qoşulğan BMT Nizamnamesinde belgilengen aqqıesasında yapılğanını añlattı.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
