Ukraina Tış işleri nazirligi, tış işleri naziriniñ muavini Olena Zerkalniñ sözlerine esaslanaraq, Twitterde haber etkenine köre, Qırımda keçken saylâvlardan soñ sanktsion cedvellerni kenişletüv üzerinde çalışacaq.
«Ukraina Qırımda keçken saylâvlardan soñ sanktsion cedvellerni kenişletüv üzerinde çalışacaq. Siyasiy aqibetleri – bu eñ azından vaqtınca işğal etilgen Qırım MC territoriyasında saylâvlar keçirilgenini qanunsız dep tanılması», – denilmekte Ukraina MİDiniñ haberinde.
Martnıñ 7-nde Zerkal ilhaq etilgen Qırımda Rusiye saylâvlarınıñ keçirilüvine alâqadar olğan er kes sanktsiyalar altına tüşecegi aqqında haber etken edi. Onıñ sözlerine köre, sanktsiyalar altına saylâvda qatnaşqanlar degil de, bu esnasnı teşkil etkenler tüşebile.
Rusiye prezidenti saylavlarınıñ ötkerilmesi 2018 senesi mart 18-ne – Qırım ilhaqınıñ yıllığı qayd etilgen künge tayın etildi.
Ukraina prezidenti Petro Poroşenko dünya cemaatçılığını ilhaq etilgen Qırımda Rusiye prezidentiniñ kelecekteki saylavı neticelerini tanımamağa çağırdı.
Martnıñ 1-nde Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavlarınıñ qanuniyligini tanımamağa çağırdı.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
