Suriyede Rusiyeniñ An-26 naqliyat uçağı yıqılıp tüşti. Rusiye Mudafaa nazirliginiñ bergen malümatına binaen, 32 adam telef oldı.
«Martnıñ 6-nda, Moskva saatine köre, saat 15:00 civarında Hmeymim ava limanına qonacaq Rus naqliyat uçağı An-26 yıqılıp tüşti. İlk malümatqa köre, uçaqta 26 yolcu ve ekipajnıñ altı azası bar edi. Olarnıñ episi oldü», – dep aytıla müessiseniñ beyanatında.
Nazirlikte qayd etile ki, qazanıñ sebebi - tehnikiy bozuqlıq olmaq mümkün. Rusiye Mudafaa nizirliginiñ malümatına köre, uçaq, uçuş-qonma yolağına qadar 500 metr qalğanda, yerge uruldı.
Müessisede: «O yerden berilgen maruzağa binaen, uçaqqa ateş açılmağan edi. Rusiye Mudafaa nizirliginiñ komissiyası vaqianıñ çeşit versiyalarını taqiq etecek», – dep qayd etildi.
Rusiye silâlı quvetleriniñ Suriyedeki arbiy ameliyatları 2015 senesi küzden berli ötkerile. Rusiye prezidenti Vladimir Putin defalarca Rusiye orduları, arbiy vazifelerni «eda etip», Suriyeden «çıqarılğanını» beyan etken edi.
