Ukraina siyasiy talilcisi Yuliya Tişçenko, qırımtatarlarğa Ekinci cian cenki vaqtında ketirilgen zarar içün Almaniyadan reparatsiyalar talap etmek teşebbüsleri, «Rusiye informatsion saasında içki qullanuv içün yapılalar», dep tüşüne. Bu fikirni o, martnıñ 7-sinde Qırım.Aqiqat Radiosı efirinde bildirdi.
Talilci: «Maña köre, Almaniya ve diger devletlerden reparatsiya aluv talabı, Qırım tışında ciddiy olaraq qabul etilmez. Büyük ihtimal ile bu, içki qullanuv içün kampaniyadır. O, Qırım musulmanlarınıñ diniy idaresi yanında Rusiye rejimine sadıq, kvazi-Meclis kibi bir şey olğan yañı qurulğan şurağa alâqalı olaraq başlandı. Ondan ğayrı bu, qırımtatarlarnı «Büyük Ğalebe» ve qaramanlaştırılğan İosif Stalin aqqında narrativge kirsetmek teşebbüsidir», – dep qayd etti.
Daa evel Qırım ve Aqyar musulmanlarınıñ diniy idaresi muftisiniñ muavini Ayder İsmailov, Qırımda Ekinci cian cenki vaqtında yarımadağa ketirilgen zarar içün Almaniyadan reparatsiyalar aluv boyunca yol haritasınıñ meydanğa ketirilgenini bildirdi. Onıñ aytqanına köre, bu zararnıñ muayyen kölemini tarihçılar, içtimaiyatçılar, iqtisadiyatçılar ve adliyecilerden ibaret mahsus komissiya tayin etecek.
2014 senesinde yarımada Rusiye tarafından ilhaq etilgen soñ Qırım musulmanlarınıñ diniy idaresi öz areketlerini Meclisnen koordinatsiya etmekten vazgeçti ve Rusiyeniñ qanunları boyunca Qırım ve Aqyar musulmanlarınıñ diniy idaresi (QAMDİ) olaraq ğayrıdan resmen qayd etildi.
Almaniyadan reparatsiyalar aluv boyunca plan daa fevralde Qırım musulmanlarınıñ birinci Nevbetten tış qurultayında taqdim etildi. Rusiye Devlet dumasınıñ ilhaq etilgen Qırımdan deputatı Ruslan Balbek jurnalistlerge, mesele sadece «maddiy talap»ta degil, esası – facianı hatırlatmaqtır, dedi.
