Amnesty International Ukraina teşkilâtınıñ icraiy mudiri Oksana Pokalçuk, Qırımdaki «Hizb ut-Tahrir işi»nde qabaatlav, «asılında bir şey isbatlap olamağan Rusiye FSBsi şaatınıñ ifadelerinde qurulğan», dep saya. Bu fikirni o, martnıñ 7-sinde Qırım.Aqiqat Radiosı efirinde ifade etti.
Aq-uquq qorçalayıcısı: «Mahkemeni közetip, qabaatlavda yeterli deliller olğanını aytıp olamayım. Aynı zamanda SBUnıñ sabıq hadimi olğan FSB hadimi Kompaneytsev tosat-tosat ifadelerini qarıştıra ve bütün tafsilâtlarını bir arağa qoşıp olamay edi. O, pek çoq vaqıt «Hizb ut-Tahrir»niñ ne olğanını, onıñ sturkturasını ve diger tafsilâtlarnı añlattı. Lâkin yaqalanğanlarnıñ bu teşkilâtnen alâqalarına kelgende, Kompneytsev açıqtan qarışıp başlay ve iç bir şeyni isbatlap olamay edi… Sanki altı kişi plansız, bağsız, silâsız akimiyetni devirecek edi», – dep qayd etti.
Advokat Aleksey Ladin, telükesizlik hadimlerine böyle ciddiy qabaatlavlar «başından soñuna qadar ameliy maqsatlar» içün kerek, dep ilâve etti.
Advokat: «Menim fikrimce, «Hizb ut-Tahrir işi» siyasiy maqsat ile başlandı. Mahkeme qorçalavnıñ iç bir delillerini diñlemey ve avtomatik surette tevqif muddetlerini uzata… Maña köre, qabaatlanğanlarnı böyle ağır cinayetlerde qabaatlav, olarnı bir yıldan ziyade tahqiqat izolâtorında tuta bilmek içün yapıladır», – dep hulâsa çıqardı
Martnıñ 5-nde Rusiyeniñ kontroli altında olğan Aqmescitteki Kyiv rayonı mahkemesi Bağçasaraydaki «Hizb ut-Tahrir işi»niñ üç figurantı: Timur İbragimov, Ernes Ametov ve Server Zekiryayevniñ azatlıqnı sıñırlav tedbirini iyünniñ 9-na qadar uzattı. Daa evel aynı tevqif muddetini Seyran Saliyev, Memet Belâlov ve Suleyman Asanov içün tayin etildi. Advokat Ayder Azamatov mahkemeniñ qararına, esassız ve adden aşırı sert dedi.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarınıñ qullanılmasını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» olaraq tanılğan 15 birleşmeniñ cedveline kirsetti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetine köre yapılğanını tüşüneler. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd ete. Halqara uquq, işğal etilgen territoriyada işğal etken devletniñ qanunlarını tatbiq etmekni yasaq ete.
