Geniçesk rayon memuriyeti martnıñ ortasından itibaren ilhaq etilgen Qırım memuriy sıñırındaki kiriş-çıqış noqtalarına qadar yolcu naqliyatı qatnavunı vaqtınca temin etecek naqliyatçını tayin etecek, dep haber etti Qırım.Aqiqat Radiosına Ukraina prezidentiniñ Qırım MC temsilcisiniñ muavini İzet Gdanov.
«Şimdilik Geniçesk rayon memuriyeti vaqtınca bir naqliyatçını tayin ete ve yaqın zamanda o iş mıtlaq bir tertipke ketirilecek. Bu mesele mart ayınıñ ortasına qadar al etilmeli. Men er kesni sakinleştirmek isteyim: er kes qorqqanı kibi iç bir türlü yıqıp taşlav, iç bir türlü aydutlıq yapılmaycaq. Qırım politsiya idaresiniñ mında köçürilgeni sebebinden yerli yolcu naqliyatını bir tertipke kirsetmek içün, bizler belli bir küçke saipmiz», – dep qayd etti memur.
Vaqtınca işğal etilgen territoriyalar işleri naziriniñ birinci muavini Yusuf Kurkçi, resmiy avtostantsiyalarnıñ teşkil etilüvi nevbetteki adım olmaq kerek olğanını qayd etti.
«Memuriy sıñır terkibinde avtostantsiya ve yemekhanesinen beraber memuriy hızmet bergen servis zonası teşkil etilmesi planlaştırıla. Amma eñ muimi şudır: avtostantsiyanıñ açıluvı çeşit strukturalarğa marşrutlar işlep çıqarmağa ve dağıtmağa fursat berecek. Ancaq Ukraina qanunnamesine köre Qırım yönelişinde çalışacaq resmiy yolcu naqliyatı olmaycağı ve olar tek kiriş-çıqış noqatsına qadar qatnaycağını añlamaq kerek», – dep qayd etti nazir muavini.
Martnıñ 1-nden itibaren Qırım memuriy sıñırına qadar qatnaycaq eki dane şeerlerarası tren çalışıp başladı. Vaqıt ceetinden olar şeerge qatnağan Kyiv ve Harkiv trenleriniñ keliş saatine uyğunlaştırıldı. Şeerlerara trenler «Kalançak» kiriş-çıqış noqtasına 10 km mesafede yerleşken «Vadim» stantsiyasına qadar qatnaycaq. Ukraina prezidentiniñ Qırım MC daimiy temsilcisi Boris Babin bu stantsiya ile memuriy sıñır arasında resmiy yolcu naqliyatı çalışıp başlaycağına söz bergen edi.
