Rusiye ilimler akademiyasınıñ prezidenti Aleksandr Sergeyev yarımadanıñ territoriyasında suv qıdırmaq maqsadınen Qırımda geofizik tedqiqatlar keçirmekni teklif ete.
Martnıñ 5-nde rusiyeli «RİA Krım» informatsion agentligi haber etkenine köre, Sergeyev bu aqta Aqmescitte jurnalistlernen körüşken vaqıtta ayttı.
«Qırım suv resurslarını geofizik ceetten tedqiq etmek içün bayağı ciddiy vazifeler olğanını köremiz. Qırım (Şimaliy Qırım – QA) kanalı qaç yıl çalıştı! Ahır-soñu, suv faqat deñizge aqmağan edi de. İhtimal, o yaqın bir yerdedir. Belki onı, kerçekten de, yañı usullarğa köre qıdırmaq kerektir? Çünki ayatıñız içün kerek olğan bir kubokilometr suv – al-azırda yoq. Ancaq onı bir yerden tapmaq kerek», – dep bildire agentlik Sergeyevniñ sözlerini.
Ayrıca, matbuatta yazılğanına köre, RİA reberi ilim ögünde «işletilgen suvlarnı aqılnen qullanıp, tatlılaştıruv usullarına» bağışlanğan meseleler turğanı aqqında söz yürsetti.
Rusiye Qırımnı işğal etken soñ Ukraina yarımadanı Dnipro özeninen bağlağan esas yolaq olğan Şimal-Qırım kanalı üzerinden yarımadağa suv berilmesini toqtattı. Ukraina Qırımnıñ suv ihtiyaclarınıñ 85%-ni bu kanal vastasınen teminley edi.
