Devletke hainlik zanı ile şübheli olğan QMC Yuqarı Radasınıñ sabıq deputatı Oleg Gordeyevniñ işi boyunca Kyivniñ Dvorânskiy mahkemesindeki azırlıq mahkeme oturışuvı aprelniñ 4-ne avuştırıldı. Bunı Qırım.Aqiqatqa martnıñ 5-nde QMC prokuraturasınıñ matbuat hizmetinde bildirdiler.
Muessisede: «Qabaatlanğan ve onıñ qorçalayıcısı kelmegenleri içün ve bundan ğayrı diger mahkeme ceryanlarında kollegiyalar erkânında bulunğan akemler meşğul olğanları içün azırlıq mahkeme oturışuvı ötkerilmedi. Gordeyevge dair nevbetteki mahkeme oturışuvı 2018 senesi aprel 4 künü (Kyiv vaqtı boyunca) saat 11:00-ge tayin etildi», – dep bildirdiler.
Sabıq Qırım deputatını Ukraina Cinaiy kodeksiniñ 111-nci maddesiniñ birinci qısmı boyunca devletke hainlik etkeninde qabaatlana.
2014 senesi martnıñ 16-sında Qırım ve Aqyar şeeri territoriyasında yarımadanıñ statusı boyunca dünya tarafından tanılmağan referendum ötkerildi. Rusiye, onıñ neticesine esaslanıp, Qırımnı öz toprağına qoştı. Ne Ukraina, ne Avropa Birligi, ne de AQŞ referendumdaki rey berüvniñ neticelerini tanımadılar. Martnıñ 18-nde Rusiye prezidenti Vladimir Putin Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
