Finlândiya tış işleri naziri Timo Soini 2014 senesi fevral-mart aylârında Rusiye tarafından Qırımnıñ ilhaq etilüvini takbih etti.
Bu aqta Soini martnıñ 5-nde Kyivde Ukraina tış işleri naziri Pavlo Klimkin ile keçirgen ortaq matbuat konferentsiyasında söz yürsetti.
«Finlândiya Ukrainanıñ topraq bütünligi ve suverenitetine qol tutıp, öz noqta-i nazarından vazgeçmey. Eki aftağa barmay biz Qırımnıñ qanunsuz ilhaqınıñ dört yıllığını hatırlaycaqmız. Biz Qırımnıñ ilhaqınen Rusiyeniñ Ukrainağa qarşı yapqan areketlerini takbih etemiz», – dep bilidire UNİAN Soininiñ sözlerini.
Diplomat Donbassta daimiy tınçlıq sulhını arttırmaq zarur olğanını ve muzakerelernen Minsk añlaşmalarınıñ amelge keçirilüvi bunıñ içüb yekâne yol olğanını qayd etti.
«Çatışmanı çezmek içün berilecek teklifler beklene, ancaq olar Ukraina tarafından qabul etilmeli» – dep ilâve etti Soini.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
