Qırımnıñ Keriç boğazında martnıñ 5-ne keçer gecesi boğday yüklengen «Andor» adlı yük gemisi ile Qara deñiz «Hors» balıqçı gemisi olaraq eki Rusiye gemisi çarpışqan.
Rosmorreçflottan alınğan malümatqa esaslanğan Rusiyeli informatsion agentlikleri haber etkenine köre, yük gemisi pek az ziyan körgen, zararlanğan şahıslar yoq.
«Keriç boğazında bu gece saat 3-ke yaqın çarpışma yüz berdi. Çarpışmada üzerinde 3,3 ton boğday yüklengen «Andor» adlı yük gemisi (Taganrog, Rusiye bayrağı) iştirak etti. O Keriç boğazında lengerini atacaq noqtağa tahminen 6 kont tezliginen ketken arada, «Hors» adlı (Keriç limamına qaydlı, Rusiye bayrağı) qara deñiz balıqçı gemisinen çarpışa», – dep bildire TASS Rosmorreçflotnıñ sözlerini.
KHV malümatına binaen, çarpışqan soñ «Andor» lenger atqan, balıqçı gemisi ise, Keriçke doğru keterek, bir saattan soñ demirge bağlanğan.
Gemilerniñ çarpışuv sebebi ögrenilmekte.
Rosmorreçflotnıñ saytında vaqianen alâqalı iç bir malümat yoq.
2014 senesi iyül ayından itibaren Ukraina resmiy olaraq Rusiye tarafından ilhaq etilgen Qırımnıñ bütün limanlarını işini toqtattı, yarımadanıñ limanları halqara gemi qatnavı içün qapalı.
2017 senesi avgustnıñ 1 ile 2018 senesi yanvarniñ 31-ne arasında Qırımnıñ qapalı limanlarını 3591 dane qanunnı bozğan gemi kirip çıqqandır.
