Keçken afta içinde Kremlniñ kontroli altında olğan Qırım Rosselhoznadzorı (Veterinariya ve fitoveterinariya nezareti boyunca federal hizmet) inspektorları ilhaq etilgen Qırımğa 150 kilogrammdan ziyade erzaq ve üç ayvannı yibermediler. Bunı muessiseniñ matbuat hizmeti bildire.
Muessisede, mahsulat ve ayvanlarnıñ Ukrainanıñ qıtadaki territoriyasına qaytarğanlarını ilâve ettiler.
Rosselhoznadzornıñ malümatına köre, bu yılnıñ başından Ukrainanıñ qıtadaki qısmına umumen 1694 kg mahsulat qaytarıldı.
Qomşu Rusiye ve ilhaq etilgen Qırımda, Qırım ilhaqı ve Ukrainanıñ şarqındaki tecavuzı içün daa evel Moskvağa qarşı sanktsiyalarnı qabul etken devletlerge qarşı erzaq ve köy iqtisadiyatı mahsulatınıñ ithalâtına sıñırlav tedbirleri tatbiq etildi.
